ಬಾಲಿವುಡ್‌ನ ಎಲ್ಲಾ ಕಲೆಕ್ಷನ್‌ ದಾಖಲೆ ಪುಡಿ ಪುಡಿ ಮಾಡಿದ ಪುಷ್ಪ-2

ಸ್ಟೈಲೀಶ್ ಸ್ಟಾರ್​ ಅಲ್ಲು ಅರ್ಜುನ್ ಹಾಗೂ ರಶ್ಮಿಕಾ ಮಂದಣ್ಣ ಅಭಿನಯದ ಪುಷ್ಪ 2 ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಫುಲ್ ಹವಾ ಕ್ರಿಯೇಟ್ ಮಾಡುತ್ತಿದೆ. ರಿಲೀಸ್ ಆದ ಒಂದು ವಾರದಲ್ಲೇ 1,000 ಕೋಟಿ ರೂಪಾಯಿಗೂ ಅಧಿಕ ಹಣ ಗಳಿಸಿದೆ ಎಂದು ಹೇಳಲಾಗುತ್ತಿದೆ. ಬ್ಲಾಕ್ ಬಸ್ಟರ್ ಹಿಟ್ ಆಗಿರುವ ಪುಷ್ಪ 2 ಸಿನಿಮಾ ಹಿಂದಿಯಲ್ಲೂ ದೊಡ್ಡ ಮಟ್ಟದಲ್ಲೇ ಹಣ ಸಂಗ್ರಹ ಮಾಡುತ್ತಿದೆ.

ಸುಕುಮಾರ್ ನಿರ್ದೇಶನದ ಪುಷ್ಪ ಸಿನಿಮಾ ಭಾರತ ಸೇರಿದಂತೆ ವರ್ಲ್ಡ್​​ವೈಡ್​ ಡಿಸೆಂಬರ್ 5 ರಂದು ರಿಲೀಸ್ ಆಗಿತ್ತು. ಅಂದಿನಿಂದ ಸಿನಿಮಾ ಥಿಯೇಟರ್​ಗಳಲ್ಲಿ ಅದ್ಭುತ ಪ್ರದರ್ಶನ ಕಾಣುತ್ತಿರುವ ಸಿನಿಮಾ ಹಣ ಗಳಿಕೆಯಲ್ಲೂ ಹಿಂದೆ ಬಿದ್ದಿಲ್ಲ. ಸಿನಿಮಾದಲ್ಲಿ ಅಲ್ಲು ಅರ್ಜುನ್ ಹಾಗೂ ರಶ್ಮಿಕಾ ಮಂದಣ್ಣ ಅವರ ನಟನೆಗೆ ಅಭಿಮಾನಿಗಳು ಕಳೆದು ಹೋಗಿದ್ದಾರೆ. ಇನ್ನು ಐಕಾನ್ ಸ್ಟಾರ್​ ಮ್ಯಾನರಿಸಂಗೆ ಥಿಯೇಟರ್​​​ಗಳಲ್ಲಿ ಶಿಳ್ಳೆ, ಚಪ್ಪಾಳೆಗೆ ಏನೂ ಕಡಿಮೆ ಇಲ್ಲ.

ದಕ್ಷಿಣ ಭಾರತ ಮಾತ್ರವಲ್ಲ ಹಿಂದಿ ಮಾತನಾಡುವ ಪ್ರದೇಶಗಳಲ್ಲೂ ಅಲ್ಲು ಅರ್ಜುನ್ ಈ ಸಿನಿಮಾದ ಮೂಲಕ ತಮ್ಮನ್ನು ಗುರುತಿಸಿಕೊಂಡಂತೆ ಆಗಿದೆ. ಪಂಜಾಬ್, ರಾಜಸ್ಥಾನ್, ಮುಂಬೈ, ಬಿಹಾರ್, ಗುಜರಾತ್ ಸೇರಿ ಹಿಂದಿ ಮಾತನಾಡುವ ರಾಜ್ಯಗಳಲ್ಲಿ ಪುಷ್ಪ ಮೂವಿಯ ಕಲೆಕ್ಷನ್ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಹಿಂದಿಯಲ್ಲಿ ಮಾತ್ರ ಪುಷ್ಪ ಮೂವಿ 600 ಕೋಟಿ ರೂಪಾಯಿಗಳನ್ನು ಕಲೆಕ್ಟ್ ಮಾಡಿದೆ ಎನ್ನಲಾಗಿದೆ. ಈ ವಾರದಲ್ಲಿ ಹಿಂದಿಯಲ್ಲಿ ₹700 ಕೋಟಿಯನ್ನು ಮೀರುವುದು ಪಕ್ಕಾ ಎಂದು ಹೇಳಲಾಗುತ್ತಿದೆ.

ಕೇವಲ 6 ದಿನಗಳಲ್ಲಿ ಸುಲ್ತಾನ್ (₹301 ಕೋಟಿ), ಭಜರಂಗಿ ಭಾಯಜಾನ್ (₹315.50 ಕೋಟಿ), ಸಂಜು (₹334.50 ಕೋಟಿ), ಟೈಗರ್ ಜಿಂದಾಹೈ (₹339 ಕೋಟಿ), ದಂಗಾಲ್​ (₹374.50 ಕೋಟಿ) ಈ ಎಲ್ಲ ಹಿಂದಿ ಸಿನಿಮಾಗಳ ರೆಕಾರ್ಡ್ ಅನ್ನು ಪುಷ್ಪ ಬ್ರೇಕ್ ಮಾಡಿದೆ. ಇನ್ನು ಥಿಯೇಟರ್​​ಗಳಲ್ಲಿ ಪ್ರದರ್ಶನ ಕಾಣುತ್ತಿರುವುದರಿಂದ ಈ ವಾರ ಅನಿಮಲ್, ಪಠಾಣ್, ಗದರ್, ಜವಾನ್ ಸಿನಿಮಾಗಳ ದಾಖಲೆ ಉಡೀಸ್ ಮಾಡುವ ನಿರೀಕ್ಷೆ ಇದೆ ಎಂದು ಹೇಳಲಾಗುತ್ತಿದೆ.